Bretton-Woods-System

As Bretton-Woods-Süsteem wird die internazionali Wäärigsornig bezäichnet, wo noch em Zwäite Wältchrieg erschaffe worden isch und e Wäggselkursbandbräiti ghaa het, wo vom US-Dollar as Ankerwäärig bestimmt gsi isch. D Idee isch s gsi, ass s Süsteem d Vordäil vom ene flexible Wäggselkurssüsteem mit dene vom ene feste veräint.^[1] Es isch schliesslig noch eme Vorschlag vom Harry Dexter White (1892–1948) umgsetzt worde.

S Süsteem het si Naame vom Ort Bretton Woods im amerikanische Bundesstaat New Hampshire überchoo, wo d Finanzminister und Nootebankguwernöör vo 44 Staate vo de spöötere Siigermächte^[2] vom 1. bis zum 22. Juli 1944 zur Komferänz vo Bretton Woods zämmechoo si und zum Abschluss s Bretton-Woods-Abkomme underschriibe häi. Zum s Abkomme z kontrolliere und duuresetze het mä druf d Bretton-Woods-Organisazione bzw. -Instituzione, d Wältbank und dr Internazionale Wäärigsfon (IWF), gründet.

D Bundesrepublik Dütschland isch im Bretton-Woods-Süsteem 1949 im Joor, wo si gründet worde isch, bidräte.

Am Aafang vo de 1970er Joor isch s Bretton-Woods-Abkomme ufgee worde, d Instituzione häi zum Däil nöiji Funkzioone überchoo und witergmacht. S Syschtem mit relativ fixe Wechselkurse isch dodermit zugunschte vom sog. Floating, wo sich d Kurse entschprächend Aagebot und Nochfroog am Määrt (au vo dr Spekulation) frei bewege, ufgee worde.^[3]

1. ↑ Michael D. Bordo: The Bretton Woods International Monetary System: An Overview. In: Michael D. Bordo, Barry Eichengreen: A Retrospective on the Bretton Woods System. The University of Chicago Press, 1993, ISBN 0-226-06587-1, S. 5.
2. ↑ Vgl. Glossar-Eintrag Archivlink (Memento vom 23. Februar 2015 im Internet Archive) vom Bundesfinanzministerium
3. ↑ A. Woll: Allgemeine Volkswirtschaftslehre